Hizbullaha məxsus minlərlə peycerin Livandakı partlayışı ilə bağlı araşdırmalar dərinləşir.
Avropa .info “Reuters”ə istinadən xəbər verir ki, məhv edilmiş peycerlərin təsvirləri Tayvanda yerləşən “Gold Apollo” şirkətinin istehsal etdiyi cihazlara uyğun gəlib.
“Gold Apollo” isə 18 sentyabrda verdiyi açıqlamada cihazların lisenziya aldıqları Budapeştdə yerləşən “BAC Consulting” tərəfindən istehsal edildiyini açıqlayıb. “BAC Consulting”in sahibi və baş direktoru Kristiana Barsoni-Arkidiakono “NBC News”a bildirib ki, onlar “Gold Apollo” ilə işləyirlər, lakin məlum peycerlərin istehsalında iştirak etməyiblər.
Hazırda Bolqarıstan və Norveçdəki şirkətlər diqqət mərkəzinə düşüb. Hadisə ilə bağlı bəzi suallar hələ də cavabsız qalıb. Livanda insan itkisinə səbəb olan peycer olayının mənbəyinin araşdırılması qlobal miqyas alıb. Bolqarıstan, Norveç, Macarıstan və Tayvanda bəzi şirkətlər araşdırmanın diqqət mərkəzində olub.
Bolqarıstandakı şirkət diqqət mərkəzindədir. Bolqarıstanın milli yayımçısı bTV-nin təhlükəsizlik mənbələrinə əsaslanaraq verdiyi xəbərə görə, bu ölkədəki bir şirkət Budapeştdə “BAC Consulting” ilə kommersiya fəaliyyəti həyata keçirib. Sövdələşmə ilə bağlı 1,6 milyon avroluq transfer Bolqarıstan üzərindən Macarıstana göndərilib. Şirkətin təsisçisi məsələ ilə bağlı şərh verməkdən imtina edib.
Bolqarıstan səlahiyyətliləri həmçinin ölkədə bir şirkətin mümkün əlaqələrini araşdırdıqlarını açıqlayıb. Yerli mətbuatın məlumatına görə, Sofiyada yerləşən “Norta Global Ltd.” şirkəti Hizbullaha peycerlərin satışında vasitəçilik etmiş ola bilər.
Bolqarıstanda fəaliyyət göstərən “Norta Global” şirkətinin qurucusu Rinson Xosenin Norveçdə yaşadığı müəyyən edilib. Oslonun sakit bir qəsəbəsində yaşayan Xose mövzu ilə bağlı sualları cavablandırmaqdan imtina edib. Çalışdığı DN Media şirkətinin baş direktoru Amund Djuve vəziyyəti polis və təhlükəsizlik bölmələrinə xəbər verdiklərini açıqlayıb. Oslo polisi ortaya çıxan məlumatla bağlı “ilkin araşdırma” başlatdıqlarını elan edib.
Norveçin daxili kəşfiyyat agentliyi PST vəziyyətdən xəbərdar olduqlarını bildirərək əlavə şərh verməkdən imtina edib. Peycerlərin necə və nə vaxt silaha çevrildiyi hələlik məlum deyil
