Rusiyanın MiQ-31 qırıcı təyyarəsi qəzaya UĞRADI
- 12:31 - 02 Dekabr
Rusiyanın MiQ-31 qırıcı təyyarəsi Primorsk diyarında qəzaya uğrayıb.
Avropa.info bildirir ki, bu barədə Fövqəladə Hallar Xidməti məlumat yayıb.
Məlumata görə, MiQ-31 havaya qalxdıqdan dərhal sonra qəzaya uğrayıb. Təyyarə Alekseevka kəndi yaxınlığındakı meşəyə düşüb. Ekipaj paraşütlə atılıb.
Pilotların vəziyyəti araşdırılır. "İlkin məlumatlara görə, tələfat və dağıntı yoxdur”, - deyə fövqəladə hallar xidməti əlavə edib.
Hadisə ilə bağlı məlumatı Şərq Hərbi Dairəsinin mətbuat xidməti də təsdiqləyib.
“Dekabrın 2-də Primorsk diyarında planlaşdırılmış təlim uçuşu zamanı MiQ-31 təyyarəsi qəzaya uğradı. Ekipaj atıldı”, - mətbuat xidməti bildirib.
Rayondan verilən məlumata görə, hadisə yerinə axtarış-xilasetmə xidmətinin Mi-8 helikopterləri göndərilib. “Uçuş sursatsız həyata keçirilib. Təyyarə boş yerə düşüb, yerdə dağıntı yoxdur. İlkin məlumata görə, hadisəyə səbəb texniki nasazlıq ola bilər”, - deyə onlar əlavə ediblər.