Bəşər Əsəd ordunu tərk edən hərbçilərə amnistiya elan etdi: Suriyalılar üçün yeni tələ? – Ekspertlər bu qərara şübhə ilə yanaşır

  • 13:56 - 26 Yanvar

Suriyalı ekspertlər ordudan fərarilərə amnistiya elan edən Bəşər Əsəd rejiminin niyyətlərinə şübhə ilə yanaşırlar. 

Avropa.info bildirir ki, SANA xəbər agentliyinin məlumatına görə, rejim ordunu tərk edərək xaricə qaçan keçmiş hərbçilərə amnistiya elan edib. 

Məlumatda könüllü təslim olanların hamısının amnistiyaya düşəcəyi vurğulanır. 

Beynəlxalq hesabatlar rejim ordusunun Suriyada yüz minlərlə dinc sakini öldürdüyünə işarə edir. 

2021-ci ilin mayında Suriya rejiminin ordusunu tərk edənlər üçün amnistiya elan edilib. 

Suriyalı ekspertlərin fikrincə, Suriya rejiminin bu qərarı ciddi qəbul edilməməlidir. 

Omran Strateji Araşdırmalar Mərkəzindən Maen Talla qeyd edib ki, vətəndaş müharibəsi başlayandan bəri rejim fərarilərlə bağlı ümumilikdə 14 qərar qəbul edib. 

Onun sözlərinə görə, suriyalılar artıq Əsəd rejiminin bu cür qərarlarına inanmır və onları göstərici kimi qarşılayırlar. 

Talla vurğulayıb ki, rejim hər güzəştdən sonra fərariləri saxlayır, təhlükəsizlik orqanlarına çatdırır və hüquqlarını əlindən alır. 

O xatırladıb ki, Suriya rejiminin Avropaya qaçan bəzi tərəfdarları Almaniyada insanlığa qarşı cinayətdə ittiham olunaraq məhkəmə qarşısına çıxarılıb. 

“Əslində, bu qərarla rejim Avropaya qaçanlara “Ölkəyə qayıdın, yoxsa Avropada mühakimə olunacaqsınız” mesajı ilə müraciət edə bilər”, – Talla deyib. 

Araşdırma mərkəzinin əməkdaşı Jusur Vail Ülvan da öz növbəsində bildirib ki, artıq rejimə heç kim inanmır. 

Ülvan hesab edir ki, rejimin daim tərəfdarlara ehtiyacı var. “Rejim bu cür qərarlarla beynəlxalq təzyiqləri nəzərə aldığını göstərməyə çalışır. Xüsusilə də Rusiyanın təzyiqləri. Rejim siyasətini dəyişməyincə bütün bu qərarlar heç bir fayda verməyəcək”, - deyə Ülvan bildirib.


Oxunma sayı: 1266

Oxşar yazılar