Göyçayda yol qəzasında bir polis ölüb, digəri xəsarət alıb - FOTO, YENİLƏNİB

  • 00:19 - 29 Noyabr

Göyçay rayonunda ölümlə nəticələnən ağır yol-nəqliyyat hadisəsi baş verib.

APA-nın yerli bürosunun xəbərinə görə, hadisə bu gün axşam saat 21:30 radələrində Bakı-Şamaxı-Yevlax avtomobil yolunun Göyçay şəhəri ərazisindən keçən hissəsində qeydə alınıb.

Rayon sakini Məzahir Mirzəliyev "Mercedes" markalı minik avtomobili ilə hərəkətdə olarkən idarəetməni itirib, maşın yoldan çıxaraq aşıb.

Hadisə zamanı sürücü Məzahir Mirzəliyev xəsarət aldığı üçün xəstəxanaya aparılıb, onun sərnişini Murad Babayev hadisə yerində dünyasını dəyişib.

Ölən və xəsarət alan hər iki şəxs polis əməkdaşıdır.

Hazırda hüquq-mühafizə orqanlarının əməkdaşları hadisə yerindədir. Faktla bağlı Baş Dövlət Yol Polisi İdarəsinin istintaq və təhqiqat şöbəsi tərəfindən araşdırma aparılır.

Qeyd edək ki, M.Mirzəliyev Göyçay Rayon Polis Şöbəsinin Post Patrul Xidmətinin əməkdaşıdı, M.Babayev isə polis şöbəsində rabitəçi vəzifəsində çalışırdı. Hər iki şəxs bu yaxınlarda polis şöbəsində xidmətə başlamışdı.

***

Göyçay rayonunda baş verən ağır yol-nəqliyyat hadisəsi ilə bağlı Daxili İşlər Nazirliyinin Mətbuat Xidmətinin Şəki regional qrupundan açıqlama verilib.

Qrupun baş inspektoru, polis baş leytenantı Mahir Məsimov APA-nın yerli bürosunun sorğusuna cavab olaraq bildirib ki, bu gün axşam saatlarında Göyçay Rayon Polis Şöbəsinin əməkdaşı, polis serjantı Məzahir Mirzəliyev "Mercedes" markalı minik avtomobili ilə hərəkətdə olarkən idarəetməni itirib, nəqliyyat vasitəsi yoldan çıxaraq ağaca çırpılıb və aşıb.

Nəticədə avtomobildə olan sərnişin polis serjantı, Rayon Polis Şöbəsinin əməkdaşı Murad Babayev aldığı xəsarətlərdən hadisə yerində vəfat edib.

Sürücü Məzahir Mirzəliyev isə xəstəxanaya yerləşdirilib. Hazırda onun vəziyyəti ağır olaraq qiymətləndirilir.

Yol-nəqliyyat hadisəsi polis əməkdaşlarının xidmətdə olmadıqları vaxt baş verib.

Faktla bağlı araşdırma aparılır.

***

Daxili İşlər Nazirliyi (DİN) Göyçayda polis əməkdaşlarının qəzaya düşməsi ilə bağlı təfərrüatları açıqlayıb.

Daxili İşlər Nazirliyinin Mətbuat Xidmətinin rəisi, polis polkovniki Ehsan Zahidov APA-ya bildirib ki, buu gün axşam 21:00 radələrində Göyçay rayonu ərazisində Rayon Polis Şöbəsinin əməkdaşı polis serjantı Məzahir Mirzəliyev xidmətdən kənar vaxtı idarə etdiyi şəxsi "Mersedes" markalı avtomobili aşırıb.

Qəza nəticəsində sürücü M.Mirzəliyev xəsarət alıb, avtomobildə olan polis serjantı Murad Babayev isə hədisə yerində vəfat edib.

Faktla bağlı Göyçay Rayon Polis Şöbəsində araşdırma aparılır.


Oxunma sayı: 1420

Oxşar yazılar