"Azərbaycanın yolu Türkiyə ilə birgədir, KTMT və Avrasiya Birliyi ilə deyil..." - Politoloqdan "Azərbaycan KTMT-yə üzv olsun" çağırışlarına SƏRT CAVAB

16:47 - 16 Aprel

"Rusiyada Azərbaycan üçün yeni mövzu tapıblar: Dağlıq Qarabağ münaqişəsi bitdiyindən Azərbaycan Avrasiya İqtisadi Birliyinin və Kollektiv Təhlükəsizlik Müqaviləsi Təşkilatının üzvü olsun."

Bunu Avropa.info-ya açıqlamasında Atlas Araşdırmalar Mərkəzini rəhbəri Elxan Şahinoğlu deyib. Pilotoloq Azərbaycanın Türkiyə ilə hərbi ittifaqını gücləndirməsinin zəruriyyətindən danışıb.

"Rusiya müharibədən əvvəl və müharibə zamanı Ermənistanı istənilən qədər silahla təhciz etdi və bu proses indi də davam edir. Rusiya bugünə qədər Azərbaycan ərazisinə atılan “İsgəndər – M” raketlərinə aydınlıq gətirməyib. Bunun qarşılığında Azərbaycanın Türkiyə ilə hərbi ittifaqı güclənib və bu ittifaq getdikcə güclənəcək. Bunlar varkən Azərbaycanın Kollektiv Təhlükəsizlik Müqaviləsi Təşkilatına üzvlüyü mümkün deyil.

Elxan Şahinoğlu

İki il öncə “Azərbaycanın Kollektiv Təhlükəsizlik Müqaviləsi Təşkilatına üzvlüyü mümkündür” fikrini səsləndirən millət vəkillərindən biri ilə qiyabi polemikamız oldu. O fikrini belə əsaslandırırdı ki, Azərbaycan Kollektiv Təhlükəsizlik Müqaviləsi Təşkilatına üzv olsa Rusiyadan daha münasib qiymətə hərbi texnika alacaq. Həqiqətən Azərbaycan bir neçə il ərzində Rusiyadan hərbi texnika alıb, ancaq sonra bu sahədə əsas tərəfdaşlarımız Türkiyə, İsrail və Belarus oldu. Misal üçün Azərbaycan ötən il Rusiyadan hərbi texnika almayıb. Bu bizə artıq lazım deyil. Rusiyanın hərbi texnikasıyla Hərbi Qənimətlər Parkında tanış olmaq mümkündür. Ona görə “Kollektiv Təhlükəsizlik Müqaviləsi Təşkilatına üzv olaq və Rusiyadan ucuz qiymətə hərbi texnika alaq” bəhanəsi artıq işləmir.

Avrasiya İqtisadi Birliyinə gəldikdə bu quruma üzv olan ölkələr belə təşkilatdan narazıdırlar. Türkiyə və Azərbaycan Türk Şurasını gücləndirməyə qərar veriblər. Avrasiya İqtisadi Birliyinin üzvü olan Qazaxıstan və Özbəkistan da bunda maraqlıdırlar. Ancaq əgər Zəngəzur dəhlizi işə düşərsə və bununla regional layihələrin reallaşması sürətlənərsə Avrasiya İqtisadi Birliyinə maraq arta bilər. Bu məsələdə Bakı ilə Ankaranın koordinasiyası vacibdir", deyə Elxan Şahinoğlu qeyd edib.

AVROPA.İNFO